因為我主要係幫補人DSE同大學Econ，唔係補語文，所以對於點樣溫語文科無咩心得。 不過都可以講少少自己讀書果陣點樣溫英文vocab。 我依個方法幾適合底子差的同學，就算得小學程度都適用，而且好有效率。 無論你英文有幾差，你起碼都會識d小學雞字。例如想表達「望住某樣野」依個意思，英文幾差的人都會識得用look （唔識就救你唔到）。 如果想極速豐富自己的vocab，可以用同義詞詞典去查look依個字。 我自己用開依個網 http://www.thesaurus.com/ 例如我查look之後會出現一大堆意思相近的字，愈深色代表依個字愈常用。 如果你串字好差，你可以揀啲比較短的字去學，例如peek, stare，得四、五個英文字母夠易記啦掛。 然後再去yahoo字典查中文解釋，你會發現peek = 偷看 stare = 注視。 你睇到依度就成功學咗兩個新字，以後用字可以更加準確。  舉多個例子，想表達「喜歡」的意思玩過facebook都會識得用like，但係like同時有「喜歡」及「相似」依兩個意思。 依個網都會照顧到一字多義的情況，在箭咀位置可以揀唔同的意思。 例如like (相似)的同義詞有alike, comparable  （按圖放大） 而like (喜歡)的同義詞有admire, appreciate你仲可以學埋反義詞dislike, hate  由於每個字的意思同用法都會有微妙的分別，所以查字典依個過程係必要的。 不過如果瘋狂查字典，英文差的同學好快會無心機，所以用住yahoo字典先都得。你知道有依個字已經有進步。 有心機的同學可以查較好的字典，最理想係查英英字典。最緊要係睇埋例句去了解依個字的用法。 然後你可以搵本簿寫低依兩個字的意思，特別標明佢地係同look相關。 你知道佢地同look相關，就會比較容易記得。  中學果陣老師淨係識叫人漫無目的咁睇報紙，見到一個唔識的字就查一個。 結果學到的字太散、太深，你又判斷唔到個字重唔重要，好多字又長又難記，每個字之間又無一個明顯的關聯。學完好快會唔記得。 我個方法用小學雞字做主軸，然後延伸至其他相關的字。咁樣會比較深刻同有效率。 |
