這裡包括了部分我在網上討論區的回覆： 感情篇 Q：我想追夢，唔想打份無前途的工，但係女朋友唔諒解我，正一貪錢港女！ A：追夢都有分有無條件，如果屋企無條件都走去追夢唔係唔得，但係屋企人（包括父母、女朋友）就要辛苦d。 當然愛情都包括無條件的包容，但係當父母、女朋友犧牲緊的時候，男方又有冇覺得自己虧欠咗佢地，或者在其他方面作補償呢？ 唔可以純粹覺得女朋友唔支持自己就係貪錢，愛情係要雙方付出，而唔可以一味要求只有其中一方付出。 (2017-12-29) Q：點解毒男咁容易對女性動情？ A：因為毒男好少同女性講野，所以只要有女性願意同毒拎講多兩句，微笑幾聲，對毒男黎講已經係前所未有的體驗，所以就會好易鍾意人地。 (2017-06-26) Q：我暗戀咗一個女仔好耐，應該點樣同佢表白好？ A：表白只係確認關係的過程。 即係好似田徑比賽終點果條繩咁，你係跑第一自然會衝過條繩。 人地正常運動員就係練點樣跑快d。如果你淨係研究點樣衝過條繩唔會令你贏到。 人地正常人溝女係捉摸女仔心理，高登仔就淨係研究表白的方式。 你同女仔親密到某個位，大家都會有共識係埋一齊。 到時你求其帶佢去個浪漫少少的地方，表白確認關係就搞掂。 但係高登仔就淨係著重最後果下，忽略咗前面溝的過程先係最重要既野。 (2016-07-11) Q：我係家中獨子，但我依一世應該都無機會傳宗接代，累到屋企要絕後啦。 A：唔好睇得自己咁重要。就算你係獨子，你父母、祖父母、曾祖父母都會有其他兄弟姊妹，而佢地都很可能有後代。 整個家族就像是一棵百年大樹，而你只係末端的小枝節。 就算你沒有後代，你的家族都會有其他人將血脈延續下去。 就像百年大樹掉了一根樹枝，根本沒甚麼大不了。 投資篇 Q：全職炒股好唔好？ A：股市唔係一樣肯花心機、努力就一定有回報的野 全職炒唔一定表現好過兼職炒，有D人只係牛市人人贏錢果陣以為自己係股神，就辭工全職炒股。 但其實其他人返緊工一樣做到相同、甚至更高的回報，咁辭職其實無咩意義。 到熊市果陣愈輸愈多本金開始細就更加難翻身 出去搵工又解釋唔到依幾年黎做過咩 所以全職炒股除咗放棄打工收入之餘，仲放棄埋日後的career path 除非真係有實力，賺到比market return高好多的回報，否則唔值得放棄打工收入全職炒股 股市真係唔係靠努力就一定贏。 返工起碼有最低工資呀，但係如果努力研究賭波、賭馬就99%輸。 炒股呢？ 如果玩day trade，其實同賭博差唔多 如果玩中長線投資就睇人，有人研究完真係發達，亦都有人愈努力輸得愈多。但其實中長線投資都唔洗全職去做呀。 (2017-12-29) 求職篇 Q：點解我GPA爆4都搵唔到工？ A：好多人以為讀書成績愈好 = 搵工愈有利 但其實成績只係一場入場券，證明你有足夠的智商之後，interview就會考你其他野，包括溝通能力、應變能力、領導能力等等 就好似打籃球需要有一定的身高 例如得1.6m就不太可能成為一個職業籃球員 但係咪身高愈高，就一定打籃球愈好呢？咁又未必。 身高達到某一個水平之後，就要睇球技、準繩度等等的其他範疇。 一個GPA滿分但缺乏其他技能的人，跟一個身高2m但球技欠佳的籃球員一樣，不容易搵到工作。 (2018-01-03) |
